My Thoughts Wagon

Kiyun ho raha hai sheher ka manzer lahoo lahoo

Kiyun ho raha hai sheher ka manzer lahoo lahoo,

masjid lahoo lahoo hai tou mander lahoo lahoo..

Kiyun ho raha hai sheher ka manzer lahoo lahoo

Jaa-e-ama’n miley gi kahan sheher e be ama’n

jab ho raha hai tera samander lahoo lahoo..

Kiyun ho raha hai sheher ka manzer lahoo lahoo..

Kis ki nigah-e-bad ne ujaari hein bastiyan

hai goud maa’n ki,behnoun ki chader lahoo lahoo

Kiyun ho raha hai sheher ka manzer lahoo lahoo

Paani ke badlay aag falak se barasti hai

jhulsay hue badan hein tou bister lahoo lahoo

Kiyun ho raha hai sheher ka manzer lahoo lahoo..

Kiyun gaa rahe hein aap ye jamhooriyat ke geet

jab ho chuka hai aaj her ek gher lahoo lahoo

Kiyun ho raha hai sheher ka manzer lahoo lahoo..

Aey hakiman-e-mulk e khiza’n deeda, tum kaho

sehn e chaman may kiyun hai gul-e-tar lahoo lahoo

Kiyun ho raha hai sheher ka manzer lahoo lahoo

Sheher e sitam gira’n may nahin koi bhi Nadeem

Dast e Ajal uthaye hai khanjer lahoo lahoo

Kiyun ho raha hai sheher ka manzer lahoo lahoo..

masjid lahoo lahoo hai tou mander lahoo lahoo..